‘t is begin ‘82, midde in de rock en roll revival met de Stray cats en Shakin, stevens’ hebbe ein aantal vrinde van The Trashcats ( ein gruupke fieftiger jaore fans met vetkuif en baseball jeskes ) ut idee um ein eige band te vorme. Onder zien toezeend aug woord in de garage van Huib (Mr. “C”) Corneille aan ‘t Blariacum College heftig gerippeteerd met theekis, gammel drumstel en gitaar. Die theekis bespeuld door Jaakko Bucholz woord al snel verruilt veur ein contrabas en ut echte rock en roll geluud waas gebaore.

Umdet ’t geluud woord versterk , woord ut volume auk steeds harder en meuste de jónges ( Marco Schell zang en drums, Roger Corneille solo gitaar,René Scheffer slaaggitaar en Jaakko Bucholz bas) oètwièke nao Ons Huis. ein jongerecentrum in Blierick. Umdet drumme en zinge veur marco neet zo’n mekkelikke combinatie waas woord d’r nao eine zanger gezóg. Det bleek neet zoe snel te lökke , maar de oplossing kwaam vanoét eine anderen hook. Fred v/d Bogaard, sociaal werker en dökker beej Ons Huis aanwezig bleek in de zestiger jaore beej waat bands gedrumd te hebbe en kôs ut neet laote um aaf en toe spontaan achter de kaetels te kroèpe. Marco kôs zich concentreere op ut zinge , Fred pakde zien alde hobby waer op en kós tegelièkertièd Jaakko in de smièze halde. Vanaaf det moment ging ut hiel hard en speulde ze zelfs internationaal op diverse rock en roll festivals en party’s. In dees periode besloot Roger um beej ein andere band geneump Jay and the Ordinaires te gaon speule. Zien plaats woord ingenaome door Emilio Garcia . Met Emilio noome ze in “84 auk eur ièrste single , eine cover van Chuck Berry met teks van Fred , op in ut Venloos. “ Rok en Rool duit ut gans”( De Drekskaters zien gebaore) Ein initiatief van Bart den Biesen zaliger en Herm Klaassens , allebei muzikant en en in dae’n tièd oètbater van ein Venlose horecagelaegenheid. Lets “84 kreege ze ein extra bandlid in de vorm van eine erg jónge maar veural getalenteerde pianis Glenn Corneille. Glenn, ein naefke van Roger moch allein mei ónder ut toezeend aug van Fred, dae auk plechtig meus belaove det hae um persuuënlik thoès brach. Doordet Roger en Marco zien broor Huub , allebei in Jay and the Ordinaires speulde kwaam ut idee um met 2 bands Rock en Rollaovende te verzörrege, en dit met groët sukses. In “86 besloot Glenn auk um nao Jay and the Ordinaires te gaon umdet in Rockabilly zien piano spel neet zoeë zier tot zien rech kwaam. The Trashcats waare inmiddels umgeduip tot Drekskaters en speulde gezellig door tot 1987, waonao ze beslaote um oètein te gaon. In die periode ging idder ziene eige waeg, Mooder hellup,Minse Kinder,Mr R&B and his Soulshakers,The Bellhops ,Waltons, Neutjes rang enz…….. Vanwaege ut heuglikke feit det ós stad in “93 , 650 jaor zoel jubileere woord d’r in “92 beslaote um d’n draod weer op te pakke en ein ganse Venloose cd oèt te bringe. Roger weer op gitaar, Fred op drums,Jaakko op bas,Glenn op piano,Marco op zang ,René Scheffer op slaaggitaar en as extra toevoeging Marcel Joosten op sax. Deze samestelling goof auk ut nieje geluud van de Drekskaters aan , miér Rock en roll en Blues ipv Rockabilly. Aan de Majjem beej Causerie de Boelevaer woord de ièrste cd oètgereik aan Hubert van Hoof, toendertièd DJ beej Hilversum Dreej en noow beruch beej L1. De Drekskaters waare weer hielemaol truuk , de Vastelaovend woord auk steeds belangrièker dit tot òngenoege van Jaakko dae auk beej Minsekinder speulde. Umdet ein en ander neet mièr te combinere veel kooze Jaakko en Fred veur Minsekinder en Neutjesrang. Op ein groeët fees in de Maaspoort woorte 2 nieje leeje geintroduceerd , Charles Coppens op bas en (ome)Herm Klaassens op drums. Met dees 2 minse woord in 1995 de mini Cd ”Waat einen bak” oètgebrach. Ut rhythm en blues geluud van de band veel auk op beej Moulin Blues in Ospel wao zeej ein optreeje mochte verzörge tösse eur helde wie Duke Robillard en Kim Wilson, veur Herm waas ut extra feestelik want hae kós zienen held John Mayall òntmoete. Leuke anekdote is det weej eine reserve pianis ingeschakeld hadde veur Glenn umdet hae op ut punt stònd um vader te waere van ziene ièrste zoon Quincy. Dit gebeurde gelökkig nog veur ut optreeje waordoor Marco’s naef Paul as zoegenaamde reservepianis mei kós zonder auk maar eine noeët te kinne speule. In de periode hee nao besluut Herm d’r mei te stoppe vanwaege tièdgebrek. D’n opvolger wuurd de op det moment nog erg jónge Sjoerd Rutten, eine zièr getalenteerde drummer dae mei verantwoordelik is veur ein niej geluud binne de band. ‘t virtuoze pianospel van Glenn bleef auk in de res van ut land neet ónopgemerk met ut gevolg det weej steeds dökker ein beroep op Dick Franssen of Werner v. Gool meuste doon. Deze letste kwaam op ein gegaeve moment zoeë dök in beeld det Glenn um zien rol as pianis doorgoof , umdet ut veur um bijna ónmeugelik waas um as actief bandlid door te gaon. Ein godsgeschink umdet Glenn vervange neet al te mekkelijk waas , aangezeen hae de band op buun regeerde. Wie de motor weer ein bietje soepel leep kwaam ut volgende euvel. Marcel had ein zoedanige blessure opgelaupe det hae genoeëdzaak waas um de sax neer te legge. Eine groeëte klap, want Marcel waas ein van de groeëte gangmakers op de buun , neet allein op sax maar auk met zien oètstraoling goof hae ut plezeer van de Drekskaters weer. Ein gooje vervangster kwaam in de vorm van Mylène Schrijen oèt Mestreech , ein maedje met ein paar gooje lónge en eine stevige ‘scheur’ in de sax. Haopelik zien we dan noow auk aangekómme beej de definitieve versie van de Drekskaters , ein club die ein 10 tal optraejes per jaor duit en dit houfzakelik veur de lol. Waorum zoeë weinig ? Kiek maar ens beej de “ bandleeje “ op dees site , dan wit geej gelièk waat ze nog mier doon.